Matthew 13

Yesusva Olhmona Unna Os, Sesoana Nemeltindiva Os Av Men.

Mak 4:1-12, Luk 8:4-10

1Yesusva no deuvriniva venamba, wo ambo di avhoa plombpethalla, indhanam ishunilm. Diva nonamba indkumbi kusomnana, ambo alapat vevna, Yesusmba hellelmba, wo Yesusva botsra sena avhoanamba, indkumbiva nomba hellelmba vivnamba, nomba engalla kusona, Yesusva mindnam olhmonamba unvna.

4Indhanariniva witkul kuku vev hevna osora, himba nonamba witkuva kuku vevpa, bumb vupingu vev, monglava ambo kuku vepethav nambotindilla monara, wo tuawa hlapiav. Monglava honsra kuku vepethav, pethava ambo dasalm hehlathalohv senamba. No pethakoklarava witkuva lelnam phov, heva os owai, plalva pipiha vevmoa, okombara wohsimind wohvev.

7Monglava ilkoklasra kuku vepethav, wo il wohvendningewol vevpa, wohmueisowa vev. Wo heva os monglava witkuva pethabesalla kuku vepethav, wohphongas vev. No nihil besal wohkethav mindnamba. Monglava 100pelara kethavna, monglava 60pelara kethavna, monglava 30pelara kethavna. Yimba lihalmba vitava hona olhmomba, keknam hillu, beswonam ningvm.

10Hevna aonghal mahalnindva ambanamba Yesusindam, umnina, guru, esalm yimba unv hona olhmonamba hona indhanamba? Yesus unna, Sesoava pusvund venamoa hona indhanamba, wiyelmba, wo kava unvna hona olhmona. Yemba kava plalmona ishunvna, noinda Sesoa doara yemba pusvund vena, wiyelmba hona plalmomba, nemetva doarava poaita lohvna, heva os daipotava kava yemba musera ishunv.

Hillu, indhanariniva Sesoana moamba wiyerava lohvrava, Sesoava si dembraohvav hemba, wo himba si mindnam iavav. Wo heva os indhanariniva eskandva iatava Sesoana moamba, Sesoava si komavav, himba wiyeivavmoa Sesoana moamba, Sesoana nemeltindiva os av men.

13Hona indhanamba kava olhmona unna hemba, noinda himba aongna novna nona himba lovahmana vevna, heva os himba nungeilvnamoa mana vemamba, wo himba liheivnamoa plalmomba, owai.

14Himba keknam wohengivna Aisaia moashulnindrinina moam doaraminim, os novol velohv men,

Sesoa unna Israelnindm, yimba hona indhanamba si osangas hellelvohvra hona moamba, heva os yimba levrapivolvavmoa hona moana plalva. Yimba si os aslalvra, wo os aslalloh vevra, wo heva os yimba si mana vemamba nunglivavmoa. 15Manara, noinda yimba kelsombovhol av. Yena aongva nithawol vilunv, yimba beswonamba hilwilvmoa, wo yena novpa yimba novvivmoa, yimba kolthoawol viv. Yimba kamba nunglivmoa, wo yimba kamba hillivmoa, wo kana moamba liheivmoa. Yimba pevna indkoklamba wuleihivmoa. Yimba osva vitava, kava osva yemba sishona vewol vevav, heva os owai, yimba vivmoa osva. Sesoava os ona. ^a

16Yesusva mendah osangas ishulprunvna hevna aonghal mahalnindmba, ona, hona indhanamba wohengivna keknam moashulnindna moamba, wo heva os yimba katindiva, yimba beswonam novviv, beswonam hilliv, wo beswonam levrapivolv kana moamba. Yimba wohkanandhina, yeoa indk vithu.

17Nemetva mindnam avna Sesoana moashulnindva, wo himba eva mongla besal indhana, himba keknam ningvna osva, kava lihalm viv Kristusmba. Heva os owai, himba kamba nunglinamoa, yengas daipota kamba men nungliv. Himba kana moamba hellelm vivna, heva os owai himba, men yengas daipota.

Yesusva Hevna Aonghal Mahalnindm Ishunvna Plalmom.

Mak 4:13-20, Luk 8:11-15

18Yesusva mendah ishunvna hevna aonghal mahalnindm, yeoa hillivm, kava yem ishunv, indhanamba owai, no olhmona plalmomba, indhanariniva witmovpa kuku vevnamba hevna osorava.

19Indhanariniva hellevrava besal nemelmomba, Sesoana nemeltindina moamba, wo no indhanariniva gimus vetava, no moamba kek vethalmba, wo Setanmba owai, wenokombova vevavmoa, himba lelnam prorava, no moamba yukov vika. Memba os, maim oi, Sesoava osora wolai, wo Setan proiva, yukov vika. Hona moamba lehv witkulm, nom ten monara bumb vepinganam nambotindilla monara.

20Wo witkuva, temba bumb vepinganamba petharava, ambo temba dasalm nalohv senamba honsrava, no witkuva indhanam lehwol viv, himba besal nemelmomba hilliv, wohkek vithiv, wo indk vithiv, 21wo heva os himba mindnamba kek vithivmoa, os maim oi, tipla pipiha vev pethamera. Wo monglava indhanamba kinwondamomba hemba pelhola ovumnitava, osihitava hemba osva, yimba Yesustindirini, himba os kana moamba lelnam wuleihavav, himba katindilmba lohvavmoa.

22No witkuva, temba ilkoklarava bumb vepingavnamba, indhanam lehwol vivna, himba besal nemelmomba hilliv, wo sismba kinmba phungu vinvna hemba, wo himba mindnam ningvna, kava si wohtowond wohavav yunalm. Wo no nengavnangva os, ten ilkokla osom ehlathanam, wo owai, innemba phonamoa.

23Wo heva os no witkuva, temba pethabesallava bumb vepingavnamba, nomba temba indhanam lehwol viv, nom ten besal nemelmom kek vithivm, wo velokusa vivm plalmom hevm. Himba snal, maim oi, pethabesal, aralva ambo eskand wolav, heva os movolva 100pelara kethavna, monglava 60pelara kethavna, monglava 30pelara kethavna.

Yesusva Olhmona Unna, Sesoana Nemeltindiva, Monglava Nominiva Wuleihivmoa Hevna Indkoklamba.

24Yesusva mendah unvna olhmona hemba, Sesoana nemeltindi os av, indhanariniva witmovbesal hevna osora wolavna, sismba hevpa deuvrava ninmba livnamba, mongla ungund anganamba, ilkoklakul kukuvi poaita hena osora.

26Doa sismba no witmovpa phovna, wo heva os mendah vevna, wo eva ilkoklava phovnata. Wo doa andranindva nunglivnamba, anga osona aralindam, umnina, nemetva yimba temba witkuva kukuvenamba pevna osorava, es hevpa witkuva besalangasma? Owai, ilkoklanahonam phov.

28Doa osona aral unna hemba, esma ungund vina honamba. Wo andranind umnina, ata kava angarava, ilkoklava vileivav plalnahonam.

29Osona aral unna, owai, ata homeis yimba witnahonam vileivm. Sism si aembulva ksuvhoapravrava, wo kava si unvav kavna andranindmba, ilsna lumeihu boasna, niswol vivrava, doa os suweraoa nisseng vivm, wo huhul vivm witoa di kana inneduvra.

Yesusva Unna Olhmona Hemba, Sesoana Nemeltindiva Seilva Eskand.

Mak 4:30-34, Luk 13:18-21

31Yesusva henga unna olhmona, Sesoana nemeltindiva os av men, indhanariniva mana vema eusil endhav hevna osora, no movolva os sevriv, mastat, wo mindnamba nuktva movolva mendekli, himba owai, eusilnonoa. Wo heva os himba nungi lelnam mendekli ve, wo kuvhoawol ve osonnamba monglava, wo tuawava di lamba dembrulsihav klallava.

33Yesusva mendah unvna olhmonangas, Sesoana nemeltindiva os av men, ungevliriniva yisva ambo eskand vevna, wo plawanahonam imharavho vrevna, samblamong os kuendhalohvna. Wo doa sismba no plawava esvema tevwol vena bretalm.

34Yesusmba nomba temba pelkleihalohmana venavpa, himba olhmonangas unvna hemba, plalmomba owai. Himba wohengvna Sesoana moashulnindna moam, os men novol velohvm,

Sesoava os ona, kava si olhmonangas ishomana vinvra moamba indhanamba. Kava moamba no si ishunvra, doarava kava seilmba ishunnamoa, poaita komandhalohvna, nonamba ovi pethaimba kava vewolvnamba, veiva, daipota men. ^b

Yesusva Hevna Aonghal Mahalnindm Ishunvna Plalmom.

36Yesusva sandhalahapho, nomba temba tellohmana vevnamba, wo deuvram ga, wo hevna aonghal mahalnind ambanamba, umnina, kam ishunu ilkoklanam plalm osorinim.

37Yesus unna, no indhanariniva temba witkulva nemelva kukuvenamba hevna osorava, kam lehna, kava arana ombol. No osomba lehwol vev indhanam pethanindm indkumbim. Besalva witkuva lehwol viv indhanam, nom ten Sesoana nemeltindilm avm. Ilkoklava nom indhanam lehwol viv, ten Setanm engivm.

39No indhanariniva temba ilkoklava kukuvenamba kana osorava, temba hev Setan. Andranindva nomba temba osonnava kokolma vivnamba osoriniva, temba lehwol vivna Sesoana ovsongolnindm, himba hevna andra vivav, nonam hona ovi pethai mueisowa evewolvram.

40Andranindva ilkoklava osoriniva lumeihvnamba, suwera singi, wo memba osm kava si sewonamba os vevav. Kava si wolanga vungu vevav kavna ovsongolnindmba, osm himba si Sesoana nemeltindimba lesvhoawol vivra. Himba si engilvra no indhanakoklamba, temba Sesoana lohohmomba aongpa vivpa, wo indhanam owalm kekaiv viv monakoklaram.

42Sna indhanamba hemba si mendekli suwera losang vivav, wo himba si di wewusowa owovav, nihsesowanahonam, wo besal indhanamba si Sesoana nemeltindiva avav. Sesoava si hemba woklamsna vewol vevav mindnam, ovra okomba. Yimba kana moamba hellelmba vitava, aong vivm keknam, ningvm beswonam.

Yesusva Olhmona Ona, Sesoana Nemeltindi Avpa, wo Indhanamba Indkumbiva Keknam Andra Viv, Nonapopolm Alm.

44Sesoana nemeltindiva os av, disumb, disumbna aralva disumbva pethamera singvekomandhana yukovnapenam. Henga mongnanam mongova indhanariniva di andra vevna, himba petha ona snewol vena, wo nongle no disumbm, ona, pai, kava kavm honamba diva amba velei. Doa himba henga poaita ambo hehla vre pethana, wo os gana deuvram indwonam. Di himba deuvrava hevna wohva indhanam moang vinvna, osm di nona dombvna, petham nonam kovovralm hevm, no disumbnamba, temba hevpa hehla vrenamba pethanamba.

45Eva mongmomba os lohv, Sesoana nemeltindiva snal lovahv, maim oi, bisnisandranindrini, himba bisnisandra vev nona, lelna nihna, os ningthiv peral. Himba dina sovawol vevpa, wo henga indhanam monglam daswolv, dim dombolm nonam hevm.

46Doa himba nonglavna peralmba besalva, diva os lohmanav i. Himba ganamba, hevna wohva wohdombpiavnamba, indhanam daswolvna, dim nonam dombolm, osm himba no dina sovavav nomba peralva. Hev omnana no peralna aralm, kava nom vev peralm kavm, kam nisraho.

47Mongova olhmomba os lohv, Sesoana nemeltindiva snal av, maim oi, mendekli pohlalawonda tambkorini. Tambko velnindva piapovvra porava, doa tambkova snanovna snanovna diva os pilivhoa no wondarava.

48Doa henanam tambkova pilivhoara, andranindva kololavrapulvo engallam tambkonahonam. Wo di engalla himba aevulthara, tambkom pepemowoli, vei besal tambko eva tambkokokla, no indhanamba doarava hlavnamoa. Besal tambkova himba sumbra sungowol vivna, tambkokoklava himba pinganga vivna ehallam.

49Memba honamba osm olhna, si os vevav, nonamba oviva pethaiva mueisowa evewolvrava. Sesoana ovsongolnind si bukethapravav, wo naengho vewol vivra Sesoatindimba, osmba he si indhanakoklamba vileivra indhanabesal hovriniva, wo suwe mendeklirava losang vivra. Himba si wewusowa owovra nihsesoanahonam.

51Yesusva no olhmomba ishopianamba, wo hev hevna aonghal mahalnindm unna, es hevpa yimba levrapivolvma hona kana moana plalva? Hev una, iya, hev unna, lehra, himba nomba levrapivolvpa Sesoana doaraminimomba, wo eva kana nemelmom hevm numha avramana vevrava, nom Sesoana nemeltindimom, himba nomba beswonam avav. Himba os avav, maim oi, innetna lohv hevna deuvra. Nonamba himba tihmba vevpa, himba mindnam innemba indhanamba dahwol vev, vei, doaramini inne, eva nemel inne.

Yesusva Hevna Kembellam Gavna, Heva Os Hevna Owalva Hemba Hevna Undnahonamba Lovahthamnavnamoa.

Mak 6:1-6, Luk 4:16-30

53Yesusva no olhmomba ishopieinnamba, 54wo doa os wohgana hevna kembellamba. Himba wonsihanamba sembayangduvra, hevna owalm di numhowol vevna hemba. Himba evekingil vithivna, an numha vrena Yesusmba, himba moamba besal wulluhv? An awothona, noinda himba andrava mendekliva vev, osva maim uv, Sesoa hevangas, es hevpa? 55Himba ambo Yosepna ombol, andranindrini pirini. Hena avalva Maria av, wo hena towandaslalva os av, vei Yems, Yosep, Simon, Yutas, 56wo hena hamuskovolva men pimba mongawulm aevulv, es hevpa honamba Yesusva nonoramsnamba vevpa, honamba andrava memba vevpa?

57No indhanamba mindnam duus vinivna Yesusmba os i. Wo himba owai, undnahonamba hena moamba kek vithivnamoa. Yesus unna, Sesoana moashulnindriniva ishunvrava moa besalva puehalnindmba, himba hillivav. Wo heva os himba hevna kembelnindmba moamba isholmba vintava, himba os umnivav, manam pimba hillivav.

58Yesusva ambo eskand mendekliandrava vena diva, indhanamba kolvrowolalmba, manara noinda himba keknamba undnahonamba lovahthamnavnamoa hemba.